(2)

دخلت امي وهمست بصوت واطي قالت : العنود وش تبين تاكلين؟؟؟ قلت ولاشئ... قلتها بحزم وقوه يمه ماابي شئ.. امي اول كانت دايم تتابع اكلي تجبرني اني اكل حتى بعد ماتزوجت كانت تحرجني عند زوجي اللي كان يضحك من حرصها على اكلي وكأني طفله.. بس اليوم ولاول مره احترمت رغبتي وسكتت وكأنها تقول ماله داعي الاكل مادام اخرته للدود ...
قالت يابنيتي زوجك يبي يشوفك. قلت: بصوت عالي وكاني اكلمهم من العالم الاخر لا ماابي اشوفه وطلعت ورجعت مره ثانيه قالت اذا وافقتي تشوفينه هو ينتظر في المجلس مع اخوك.... بس انا قررت اني مااعذب احد واني اقضي اخر اوقاتي الحالي قلت يمه روحي ان بغيتك ناديتك... قالت بقعد عندك اوسع صدرك ... قلت يمه ماني فاضيه ووقتي قصير طلعت وانا اتذكر الوقت اللي كنت اضيعه في امور تافهه مثلا مجلة الازياء اللي اخترت موديل زواج ماجد منها... جلست في المكتبه ساعتين علشان اختارها واشتريها والحين تركتها في المستشفى ونسيت رقم الصفحه وماراح البس الفستان ابد... يالله ياوقتي اثرك كنت غالي الحين عندي اشياء كثيره ابي اسويها بس ماعرفت زي الطالب اذا اعلن المدرس انه باقي له عشر دقايق من وقت الامتحان وهو بعد ماكتب في الورقه شئ يسلم ورقته قبل العشر الدقايق ماتنتهي لانه راح يتوه بين الاسئله وانا هذا شعوري..... ابدا بايش والا ايش...
جلست افكر شوي وطلعت ورقه وقلم قلت ابكتب وصيه .... وصيه...؟؟؟؟؟
زي الافلام اللي كنت اتابعها ياما سهرت اطالع ناس(اظنهم)اردى خلق الله وهم يفتعلون حكايات تافهه مالها بالواقع صله....... ياخساره ذاك الوقت كان ربي نازل في السماء يقول هل من مستغفر فاغفر له... هل من داعي فاجيبه... ياخساره ليتني قمت صليت ودعيت ان الله يخليني لساره وابوها ياليتني على الاقل رحت لساره وضميتهاا لصدري.... وفجأه رميت الورقه والقلم وقمت... وفتحت الدولاب وطلعت فستان حرير كان خالد يحب يشوفه علي.... ولبسته ولبست جزمه مناسبه فكيت شعري وطلعت دهن العود وحطيته على شعري ووقفت قدام المرايه وتاملت صورتي يالله كم باقي من الوقت ويندس هالجمال في التراب كم باقي من الوقت وتمشي الحشرات على هالخد النظر.... كنت اعتني بجسمي حمامات زيت وكريمات واكافح التجاعيد بس ياليتني وصلت لسن التجاعيد... ساره الوقت الممل اللي قضيته وانا اوزع شرائح الخيار على وجهي ياخساره ليتني رحت قريت سوره من القرآن ولالعبت مع ساره حبيبتي قبل لاتفقدني... وقفت وطالعت جسمي الممشوق بيتمدد في القبر بعد ساعات... ياترى ضلوعي هذي بتلتقي بضمة القبر ياترى رقبتي اللي ياما رفعت راسي لفوق بتنحني على صدري ولابتغل الى رجولي.. وتذكرت كيف اصريت اني انضم لنادي وكيف احتلت على ابو ساره واستخدمت جميع الوسائل لييين سحبت منه الموافقه سحب بالرغم من انه ماكان موافق من قلبه وكان كاره ويقول هالوقت انا اولى به يالعنود . بس لان زواج ماجد قرب وكنت ناويه اكون فتنة الحفل فيه.... والحين الله ينجيني من فتنة الممات طلعت علبة مجوهراتي ومسكت خاتم كبير اشتريته ايام زواجي كانت في الخاتم نقوش تفحصت النقش وطرا على بالي طاري ياترى انا كنت ازكي عن هالذهب ولا...لا.... اظن ابو ساره كان يزكي عن ذهبي اظن بس مااني متأكده ماقد سألته ابد... وتفحصت النقش مره ثانيه وفركت جبهتي وانا اتساءل ياترى هالرسوم بتطبع في جبهتي واكوى بها ولا ينجيني الله؟؟؟؟ تأملات غريبه طرت على بالي... ومشى الوقت بسرعه وانا بين ادويتي المهدئه وبين صلواتي وقرآني... في الليل طلعت من الغرفه ولقيت سجادة امي عند الباب امي مانامت تصلي وتدعي وجلست عندها والتفتت علي... نظراتها تجمع فيها حنان امهات الدنيا كلها ناضرتني نفس نظراتها لي يوم كنت طفله قال: تبين شئ يابنيتي؟؟؟ قلت يمه ابي رضاك.... وانفجرت تبكي... بكت وانا تحجرت الدموع في عيوني ولادمعه هليتها وانتظرت لين هدت وقالت: انا راضيه عنك يابنتي...والله انك من بين اخوانك كلهم اقل وحده تعبتيني في الحمل والولاده والتربيه ... انا راضيه عنك يابنتي والله يرضى عنك انشالله ... تنهدت براحه وقمت من عندها ومشيت لمحت اختي طالعه من الغرفه اختي من اسبوع ماشفتها بس غطت وجهها بيدها وكأنها شايفه شبح ودخلت لغرفتها بسرعه... ومشيت كنت ادور في البيت مثل مومياء اعدوها لتابوتها امشي ببطء كل اهل البيت سهرانين.. وش هالليله الغريبه كل واحد ماخذ له زاويه وجالس لحاله هالليله تشبه ليلة السفر صح فعلا هي ليلة سفر وتذكرت كيف كنت اقلق في كل ليلة سفر ولا انام صحيح ان سفري كان سياحه الا اني اتقلب في فراشي وكل شوي اروح اتأكد ان اغراضي جاهزه.... يوووه اليوم سفرتي غيـــــــــــــــر... سفرتي مافيها رجعه ومفاجأه ماني مستعده لها ابد.... مشيت على صوت ترتيل اخوي محمد للقرآن كنت اتبع الصوت لين دخلت عليه محمد ااعز اخواني على قلبي ماانسى اول ايام التزامه كيف كانو اهلي يعلقون عليه بحجة انه متشدد... وكنت اشجعه اعرف ان هذا صالحه دنيا وآخره وقلت له يصبر عليهم ويحتسب وهو الربحان في الاخير.... وفعلا بدا يجني ثمار صبره والحين الكل يثق فيه وياخذ شوره... جلست جنبه وهو يقرا تغيرت نبرة صوته يوم دخلت وبدت تتذبذب وباين كيف كان يكافح علشان يثبتها في مستوى واحد وارتفع صوته علشان يسيطر على ضعفه وانهى السوره والتفت علي... قلت محمد... وش انا مقبله عليه.. ابتسم بحماس ودموعه تهل وقعد يحكي لي عن رحمة الله وهو محافظ على ابتسامته الطيبه بالرغم من دموعه وحكالي كيف ان الله رحيم بعباده وانه احن عليهم من الام على ولدها... قلت محمد كيف الموت؟؟؟ قال انشالله بيكون سهل كـــــــ....... وقاطعته وقلت محمد وش البرزخ؟؟؟؟؟ كنت افكر بصوت عالي وابي احد يسمعني بس قال البرزخ هي الحياه بين الدنيا والاخره و......... قلت محمد كيف بيكون حالي فيها... اذا مادعيتو لي؟؟؟؟ ورفع يدينه للسماء واجتهد بالدعاء وانا طلعت من عنده وبدون لا احس ساقتني رجليني للمجلس كنت ابي اعرف ابو ساره هناك ولا راح ينام على سريره اللي اعرف انه مايرتاح الا عليه...

وجا في بالي فكره ياترى بيتزوج بعدي؟؟؟؟ اكيد انا اعرف ابو ساره مايحب الوحده ياخســــــــــــــاره..
دخلت المجلس ورفع راسه لي تمنيت اني مالقيته. وتراجعت وناداني قال العنود تعال ياحبي الاول والاخيررر.
وبكى ساعتها بس بكيت... انا كنت عارفه اني ماراح اتحمل شوفته هو بالذات قلت مالك عندي شئ ياخالد خلاص الموت بيخطفني منك اليوم يمكن اشوفك في الجنه كاننا من اهلها انشالله قال انشالله انك من اهلها انا راضي عنك يالعنود ومن ماتت وزوجها عنها راضٍ دخلت الجنه. قلت بس انا كنت مقصره معك كثير قال بالعكس حياتي معك كانت حلم جميل ماتمنيت اني افيق منه يالعنود... كل شئ معك كان له طعم حتى زعلك ودموعك وغضبك كنت في جنه يالعنود وكنت متأكد انها ماراح تستمر السعاده اللي كنت فيهاا..
وقام وقف ورفع يده بحماس وقال العنووووود والله مانسااااااك...
حرك يده وصرخ والله العظيم ماتغيبين عن بالي... وهو يحلف انا كنت اتخيله وهو ماسك يد عروسه الجديده ويطالعها بفرح وهي تبادله النظرات... خساره كان زوج نموذجي وكنت احبه خساره الله يخلفه علي.. وقمت وطلعت وكملت رحلتي الكئيبه... هالمره وقفت عند الباب اللي تنام وراه وقفت وانا احاول ابلع عبرتي ترددت ادخل ولالا.... ساره كانت متعلقه فيني كثير اول ايام مرضي كانت تبكي طول الليلتبيني بس في الاخير رضخت للظروف وتعلمت كيف تنام بعيد عن حضنيز حاولت اني ماادخل علشان خاطرها ليش اقلب مواجعها بس حسيت اني اذا ماشفتها بتتحول اخر ساعاتي الى ثواني ولاول مره اتصرف بانانيه وافتح الباب وادخل كانت اختي نوره تنام جنبها على الارض وجلست وانحنيت على ساره وشميتها ياحبيبتي ياساره وحست اختي نوره فيني وقامت مرتاعه وقالت: العنود؟؟؟ نوره ماشفتها من كم اسبوع بس ماسلمت عليها.

كنت اودع العالم وماني فاضيه اسلم.. قلت: نوره انا بنام جنب ساره اليوم وابعدت وهي متردده... وتمددت جنب ساره وضميتها وبكيت والتفت على نوره قلت: نوره تراني كان ودي اشوف ساره وهي تكبر كنت اتمنى اشوفها عروس قولي لها في يوم زواجها يانوره..... الله يخليك كنت ابيهم يذكروني ويترحمون علي بس في ذاك اليوم ولا ساره ماظن انها بتهل دمعتها علي لانها ماعرفتني زين....... تذكرت حديث الرسول ان الابن الصالح ينفع والدينه... والتفت على ساره ودي اصب عليها التربيه كلها ذيك الساعه كنت ابيها تطلع صالحه.... وتمددت جنبها وماادري كم من الوقت مر... ولاول مره اسمع صوت اذان الفجر ولااقدر اتحرك... احس ارجولي مكبله كاني في كابوس عيني ثابته على سقف الغرفه ..... حاولت اتحرك ماقدرت وصورة ساره في عيوني وهي نايمه كنت ابي اضمها ثانيه ماشبعت منها اغيب عن الوعي واصحى ثانيه شفت العالم يصرخون حوليني غرفة بنتي الهاديه امتلت بالناس اللي يبكون هذي امي وهذا اخوي محمد وهذا زوجي وهذا واحد مااعرفه اظنه طبيب... جسمي الغض متشنج والتفت سيقاني ببعض... كنت ابي ابكي استغيث بس مااقدر اتحرك قلبني الطبيب يمين ويسار كني خرقه بين يدينه وكلم اهلي وسمعت صوت بكا شديد. وآخر شئ تذكرته كان.. ابيات شعر مااحفظها زين تقول..
ولدتك امك يابن آدم باكياً.................................والناس حولك يضحكون سروراً
فاعمل ان تكون اذا بكوا..................................في يوم موتك ضاحكاً مسرورا.

وهنا حسيت بقبله رطبه على خدي وفتحت عيوني لقيت وجه قريب من وجهي وابتسامه هبلى....
ساره... هذي ساره بنتي ضميتها وبكيت... بكيت... وش صار وين انا فيه؟؟؟
وسمعت صوت خالد من دورة المياه وهو يغسل ويقول: العنود وشفيك رجعتلك كوابيسك مره ثانيه؟؟؟
تعوذي من الشيطان وقومي يالله انا الغيت كل مواعيدي علشان اوديك للخياطه.... وحمدت الله ان هذا كان حلم واني الان اقدر اضم ساره.. قلت ماابي اروح للخياطه ماابي اتركم ياخالد طلع من دورة المياه وهو مبتسم بتعجب وقال وزواج ماجد؟؟؟ قلت عندي فستان عادي ابلبسه... وابتسم وكأنه مو مصدق كلامي وفتحت الشباك وشفت العصافير .. واستنشقت هواء نقي.. وحمدت الله ان ذيك الليله الرهيبه كانت حلم.... بس حلم ممكن يصير من يضمن حياته؟؟
وقررت اني استعد لها من اليوم.. مثل ماقال الشاعر:
لولا الهرم والفقر والثالث الموت........ يالادمي بالكون ياعظم شانك
سخرت ذرات الهوا تسمع الصوت..... وخليتها اطوع من تحرك بنانك
جماد تكلمها وهي وسط تابوت....... تاخذ وتعطي ماصدر من بيانك
وعزمت من فوق القمر تبني بيوت... من يقهرك لو هو طويل زمانك
لولا الثلاث وشان من قدر الفوت...... نفذت كل اللي يقوله لسانك
ــــــــــــــــــــــــــــــــــــــــــــــــــ ــــــــــــ

اتمنى ان القصه عجبتكم ..


وتحيـــــــــــــــاتي لكم ..