ياكذبها .ياابلة سعاد!!!!

يُمه...
وين أبوي...؟!
قلتي بيجي بُكرة...
وقلتي بيجي بُكرة...!
متى يجي بُكرة...؟!
أنا أعرف الصبح يصير هو بُكره...!
وكل يوم يجينا الصبح
بس مايجي بُكرة...!
الله يايُمه...ياكرهي لبُكرة...!
صبري قضى يُمه
معاد فيني حيل




يُمه...
من يوم ذاك الصوت القوي...
اللي يهز البيت وأبوي ماشفته
صوت أيش يايُمه...؟!
سمعت معه صراخ...
وصوت إسعاف...
وحكي وبكاء...!
وأنتي تقولين إدخلي في غُرفتك...
ودخلت أنا في غُرفتي...
وجلست بالحالي...إلين جاء بُكرة...
وأبوي ماشفته...
سهرانه طول الليل



يُمه...
سمعت من سلمى تقول...
إن أبوها قال....نورة يتيمة..
طبعاً ضحكت وقلت...
ماني يتيمة...
أُمي معي بالبيت...وأبوي...
يبي يجي بُكرة
بس القهر يُمه من سالفة بُكره...!
مدري متى بُكرة...؟!
ياويلي يايُمه...!
ياويلي منه ويل.




يُمه...
صديقتي حصة تقول...
أبوي أنا مقتول...!
طبعاً ضحكت وقلت...
من يقتل أبوي...؟!
قالت لي حصة...
ناسٍ يقولون إنهم
أهل الجهاد...والدين...
وهُم مُسلمين...!
ياهي غبية حيل...
ماتدري إن أبلى سُعاد قالت لنا مرة...
(( مايقتل المسلم أخوه ))
وأبوي أنا مُسلم...
والعام حجينا سوى...وزرنا الرسول...
يحليلها حصة...
ياهي غبية حيل...



يُمه...
من جد ودي أسالك...
أشوف بعيونك كلام...!
وأسمع من شفاهك كلام...!
قولي لي يايُمه...
أبوي فعلاً إنقتل...؟!
إذا اليهود اللي قتلوه...الله يايُمه...
ياهو شرف...!
يحشر ورى حمزة...عم الرسول
أبلى سُعاد قالت لنا مرة...
(( من مات مقتول وشهيد... يبعث ورى حمزة
...عم الرسول...! ))
ودمه يسيل .



يُمه...
بس الغريب... أختي عُهود
سمعتها مرة تقول...
أبوي مقتولٍ غدر...وهو يتوضاء للفجر...!
أبوي ماجوه اليهود...؟!
وشلون يايُمه...؟!
معقوله المسلم يقتل أخوه...؟!
أبوي أنا مُسلم..يصلي ويصوم...
ودايم يسولف لي عن الجنه...
ويقول لي قصة مُحمد
معقوله يايُمه...؟!
حلال يقتل المسلم أخوه...؟!
ألله...
ياكذبها أبله سُعاد...!
قالت لنا إنه حرام...!
بس أعتقد فعلاً حرام...!
وشلون يايُمه...؟!
ووش صار بالدنياء...؟!
إلا على فكرة...!
وش معنى يايُمه كلمة عميل...؟!
وممكن يصير مُسلم عميل...؟!



يُمه...
أحس بدمعة عيوني أقبلت...
والعادة يمسحها أبوي...!
هالمرة خليها تسيل...
أدري بها دمعة يتيم...
وأدري بعد إني يتيمة...!
أبيها تحرق من غدر في روح أبوي...
أبيهاتكبر دمعتي...!
وتلعن اللي حرمني من أبوي...
تكفين يايُمه...
خليها هالمرة تسيل.



مما أعجبني