حـــــامـــــد زيــــد

05-31-2007, 07:50 PM

الحلم

"بوقت من البطا،وبليل تترقص شياطينه"
"بعد شفت الضيا ينزع من ثياب المسا ثلثين "
"تحايلت المنام اللي مثل بيتك تمرينه "
"وانا اللي من تفارقنا وأنا ماغمضت لي عين "
"غريبة!!كل حلم يمر برقادي تزورينه"
"والاغرب..كيف أحلم الحلم،وارجع واحلمه بعدين؟ "
"قبل يومين،شفتك بالمنام..وقمت من حينه!"
"ونمت أمس،ورجع نفس المنام اللي قبل يومين "
"أنا اللي قبل اسافر شلت قلبي من شرايينه"
"تركته في يدك الأمانه،واحفظيها زين "
"ترى حفظ الأمانه دين..مجبورة تردينه"
" أجل ، مافيه أحد قال لك((حفظ الأمانة دين))؟! "
"مرد المقفي بيلفي..ويستوفي ،وتوفينه"
"بعدليله،ثلاثه،أربعه،عشره،شهر،شهرين "
"إذا انتي ،ماانتي بقد الكلام اللي تقولينه"
"حرام...استامنك حاجة،وإذا جيت اطلبك تنسين "
"تخونين،وتبين أرضى!..واحد يرضى تخونينه!"
"أنا لاجيت أخونك،مع حبيبة ثانيه،((ترضين))! "
"من أول مارجعت من السفر ماشفت لك بينه؟"
"وأنا اللي كنت أحسبك قبل ادوس ارض المطار..تجين "
"تكونين أنتي أول شخص عيني تحتضن عينه"
"وكنت أتخيلك من زود فرحة رجعتي..تبكين "
"وأشوف بدمعتك حكيك..وأعرفه قبل تحكينه"
"واجيب أحلى من اللي بتحكينه،وأتركك تحكين "
"تقولين:الوطن نور..وأقول:بنورمضوينه"
"تقولي لي:غديت أحلى،وأقول:عيونك الحلوين "
"كلام نام بشفاهك..وخفتي لاتصحينه"
"ذخرتيه لغرام للي ينام...ويترك تصحين "
"تغانمتي غيابي..لين رجحتي موازينه"
"تعلم من يدك لمس الكفوف وعلمك تجفين "
"وليتك لاقيه به شي...فيني ماتلاقينه!"
"مهو بغرور..لكن خابرك مالك أمل تلقين "
"تغافلك بغلا..والإ الحلا مهو بمن زينه!!"
"تزينه الصور ..بس الصحيح ابن الحلالزوين!! "
"وأنا ماني بنقاص عنه يوم أنك تبدينه"
"نصيبي..هو نصيبي لو يسددها من الصوبين "
قنوع بمظهري،والسم سم مايذبح ثعابينه "
"إذا أهداك الزهر مره،فأنا اهديتك بساتينه"
" وإذا ألهاك بفرح ليله، فانا تهت لبكاك سنين "
"وإذا استضعفتك أملاكه...وشتتك ملايينه "
" أنا حتى فتات الخبزة أقسمها معك نصين "
"طموحي ،بس أجي وأظفر بشي تستحقينه"
"تدينته،تسلفته،سرقته،مومهم منين؟ "
"كأني من كثر ماارضى بكل اللي تمنينه "
" لو انك تطلبين الله ..يعنيني، بقول آمين "
"أنا ماالعب على الحبلين،وقت الطيش وسنينه"
"تبين الحين يوم أني كبرت العب على الحبلين؟! "
"ترى عند البدو بالذات((عيب اللي تسوينه))!!"
"حلاتك لاعشقتي..تعشقيني ليوم الدين "
"غرامٍ نسكن ضلوعه...حشيمه من مجانينه "
"جفا،يجمع معزتنا...ولاعشق يذل أثنين "
"كثار اللي تحدوني وقالولي :تحبينه"
"امانه..لاتخليني صغير بعينهم ((تكفين))!! "
"لاني كل ماقالوا((تخون))..اقول:مسكينه"
"عليك الله وأمانه..علميهم منهو المسكين "
"أنا خايف((لياطاح الجمل تكثر سكاكينه))"
"وأنا ماعاد بضلوعي مكان لطعنة السكين "
"مثل ماقالوا((المكتوب واضح من عناوينه))"
"لو ارحل منك للغربه..بسافر من ظلامك وين؟! "
"كفايه..كل حلم يمر برقادي تزورينه"
"كفاية...من تفارقنا..وأنا ماغمضت لي عين "
"قبل يومين شفتك بالمنام وقمت من حينه"
"ونمت أمس،ورجع نفس المنام اللي قبل يومين "

05-31-2007, 07:50 PM

أربع خناجر

مشكله لا جات حاجتك بيديـن البخيـل
مايفكـك ليـن تدفـع كثـر مايدفعـه

ومشكله لا صرت مطعون بكفوف الدخيل
في ظهرك اربع خناجر وبالصدر اربعـه

ومشكله لا ضاق بالوقت رجـالً ثقيـل
يطلـب احبابـه وعيـا زمانـه ينفعـه

ليت ربي مايحاسب خليـلً مـن خليـل
دام مال الحظ فزعـه وللوجـه اقنعـه

ودام مال العذل تالي ومابالحيـل حيـل
الغـلا سمـاً نذوقـه ومـرً نجرعـه

نحتري فيه القا والحصيل هو الحصيـل
مثل حلمـاً ماتحقـق وعيـت اقطعـه

كني اللي حط بشفاه من جمـر المليـل
لا قـدر يرميـه للنـاس وزرا يبلعـه

والظروف اللي حدتني لنيـران وفتيـل
عرضت دمع المحاجر لشـيً يجزعـه

والمدامـع بالغـلا لا تحـال ولا تحيـل
والمشاكل كل ماجـات جـات مجمعـه

اعذلوني عن هوى النفس وعيوني تخيل
في حبيـب ٍ ماتركتـه ولازلـت اتبعـه

مغرم في حب مثله ولا ارضى له بديـل
عيني تشوفه وقلبـي يجـوع ويشبعـه

ذاك كل مازان بالـي وطالعـت النخيـل
ماذكـرت الا ثباتـه بوقـت الزعزعـه

ماهو الاقطعة من حشـا قلبـاً عليـل
وماني الا قطعة منـه مخلـوقً معـه

لا جميل شفت قبلـه ولا بعـده جميـل
العذارا رهن رمشه وانا رهـن اصبعـه

والله انه لو طلبني اطلـوع المستحيـل
لا اطلعه مني منـاك يعنـي لا اطلعـه

ماعلي من الملامـه وهـرج الهبيـل
مشجع الرجال لا ثار غيـره مشجعـه

في عيون اللي عشقني ولا جاني هزيل
الله اللي حط عشقـه بقلبـي وزرعـه

لو سكت ينطق له الصم والدنيـا تسيـل
وان حكى لو يمشي المزن ياقف يسمعه

سلسبيل من شفاتـه يخالـط سلسبيـل
معمعه بسكات واحلا سكـات بمعمعـه

ماهقيت ان اكثر الليل يمـرح بالجديـل
لين شفته شوف عينـي بكفـه يرفعـه

وان حيت ومابقالي معـه ياكـود ليـل
لا اسهره بأول غروبه وموت بمطلعـه

والله ان العشق جمره وطاحت بالشليـل
وان حصل ماطاعك الوقت بحبابك طعـه

من هو اللي علم عداي نكران الجميـل
ومن هو اللي خان خلي وحاول يقنعـه

كل عاذل ردني عنك يالطـرف الكحيـل
ياعسى الله يقلعه ياعسـى الله يقلعـه

يامعرض قلب الاحباب للـدرب الطويـل
السعه لا بـارك الله بالضيـق السعـه

والله ان الوقت قاسي وانا مانـي ذليـل
واشهد ان الرجل مرات ظنـه يخدعـه

وانتم اتعذلون خفـاق بعيـون العديـل
مارحمتم نار جرحـه وحيـرة مدمعـه

والسوالف ليلها ليـل والحايـل يحيـل
والمشاكل مشكلـه بمشكلـه متجمعـه

مشكله لا خانك الوقت بالحمـل الثقيـل
لو زرعت الزرع هوج العواصف يشلعه

ومشكله لاصار عاذلك مايبـرد غليـل
لا تـرده طيـب كلمـه ولحـدً يمنعـه

ومشكله لا صرت مطعون بكفوف الدخيل
في ظهرك اربع خناجر وبالصدر اربعـه

05-31-2007, 07:51 PM

ادلعها وولعها

بعـد ماقابلتنـي عاتبـوهـا
على شوف الحبايب حاسبوها

خذوها وأبعدوها غصب عني
وعن وجهة طريقي جنّبوهـا

وشالوها عن عيوني غصيبه
عواذل وأغصبوني وأغصبوها

خذوها من يديني شوف عيني
وعن عيني تعدّوا وأحجبوهـا

كلام وصدّقوا بالبنـت كذبـه
وهم اللي مـن أول كذّبوهـا

وهم وشدخلهم في مال بيّـن
لبوها والخلايـق طالبوهـا

وفيّـه لاتخـون ولاتعـانـد
جسوره والمواعيد أرعبوهـا

مـلاكٍ كاملـه والكامـل الله
ولكـن العـواذل عذربوهـا

وهي كلما دعتني تشتكي لي
عن اللي سالفتنـا سرّبوهـا

تخاف وتلتفت مع كل كلمـه
تظن أن العـواذل راقبوهـا

تلفّت من عقب ماهي جريئه
شجاعه ماتهـاب وهيّبوهـا

وأهدّيها وأنـا حايـر وثايـر
مصيبـه ياعـذابٍ عذبوهـا

وهم كلما خذوها عن طريقي
تراهم صوب قلبـي قرّبوهـا

وأنا ماتعّبـت قلبـي خيانـه
خيانه رتّبوهـا وأحسبوهـا

ولا يعجز خفوقـي لايقابـل
جفا من حاربوه وحاربوهـا

وأنا لي عزّة ٍ تفرض عليّـه
أخاطب بالجفا من خاطبوهـا

وأكسر لوحة الماضي وأزيله
وأخرّبهـا مثـل ماخرّبوهـا

وأذوّقهم ندم ماصـار فيهـا
وأشرّبهم من اللي شرّبوهـا

وأدلّعهـا وأولّعهـا بنفسـي
وأشرٌّقهـا بعـد ماغرّبوهـا

وأعوّضها عن اللي راح كله
وعن ذيك الليالـي كلّبوهـا

غلاها بالحشى لازال ثابـت
ولو حتـى بغيـري حبّبوهـا

وغلاي بقلبها مـرّ وتعـدى
غلاهـا لأمهـا ولا لأبوهـا

05-31-2007, 07:52 PM

تزعلين وتقعدين

عافت الشمس المدينة وأعلنـت وقـت الـزوال
رغبةٍ للنـوم منهـا مـع عيـون الناعسيـن

أبعدت من يوم شافـت بالسمـا ضـيّ الهـلال
كنّهـا كانـت تهـزّا بالـهـلال وتستهـيـن

كفكفت صبح التلاقـي مـن ورا روس الجبـال
واستخارتني وراحت وابعدت عـن كـل عيـن

وانتي أخطيتـي خطاهـا وانعزلتـي بالوصـال
ولا رحلتي مـن سكـات ولا وعدتينـي تجيـن

عشت عمري بالمحبـة فـي سبيـل الاحتمـال
وانتي تعيشيـن عمـرك تفرحيـن وتجرحيـن

من غرورك في جمالك مـا عطيتينـي مجـال
وأدري إنـك تفهمينـي لـو بغيتـي تفهميـن

كيف أشوف الشمس تشرق بالسما وانت ظلال ؟
ومن يعيش بوسط غـارٍ للذيـاب الجايعيـن ؟

كنت أحسب الكره زايل والجفـا لـو طـال زال
ولا بديتـي بالغـرام ولا بقـى فينـي حنـيـن

أشهد إنـي مـا خطيـت ولا نويـت الانعـزال
وما خدعتك في غرامي لين شفتـك تخدعيـن

اصدقي بالوعد مـرة لـي ولـو فيهـا سـؤال
من عرفتك ما أذكر إنـك توعديـن وتصدقيـن

كنت أشوفك من عيونك تأمرين أقوى الرجـال
والله إني قبل أعرفـك مـا هقيتـك تخضعيـن

كنت أشوفك تبعدين وقلـت مـن بـاب الـدلال
وإن بعدتي عن عيوني قلـت باكـر ترجعيـن

كنتي أكثر في عيوني من عـدد وبـل الخيـال
وين أنا ما الد وجهي كنت أشوفـك تضحكيـن

وإن بغيت أصد عنك من يميـن ومـن شمـال
ما قـوت عينـي تلفّـت لا شمـال ولا يميـن

عاشقٍ والعشق بلوى وأشهد إن الحـال حـال
ولا تركتي رحمـة الله ولا عرفتـي ترحميـن

وأدري إنك في غرامـي للأسـف نلتـي منـال
افترقنـا فـي دقايـق والسبـب لعنـة لعيـن

حبك أشبه فـي غرامـي بالوصـال الانفصـال
ويلعـب الخفـاق لعبـة كبريـاء الخاضعيـن

بالهوى ماهي غريبـة نكبـة عيـال الحـلال
ولاني أول من يصون ولا انتي آخر من يهيـن

الصداقة فـي عيـون النـاس منفـى للعـدال
وكـان ردّت للصـراحـة كلبـونـا مذنبـيـن

المحبـة شبـه زالـت والصـداقـة لاتــزال
بس أببقى في عيونك ( حامد ) اللـي تعرفيـن

علّميهـا يـا قصيـدة واضربـي فينـي مثـال
عرفيهـا بالبـداوة فـي طـبـاع الأولـيـن

علّميهـا كيـف نصنـع صبرنـا والاحتـمـال
علّميهـا كيـف نفلـح بالعمـل دنيـا وديـن

علّميهـا فـي سوالـف حلّـنـا والارتـحـال
علّميهـا كيـف نظهـر جورنـا للجايـريـن

علّميهـا يـا دقايـق ، علّميهـا يـا لـيـال
علّميهـا يـا عصـور وعلّميهـا يـا سنيـن

إن عشقنا مـا بغينـا غيـر عشـقٍ بالحـلال
وإن نوينـا مـا لفينـا كـود نـاس طيبـيـن

كامليـنٍ فـي عطـانـا بــس لله الكـمـال
والرجل فينـا غرامـه لـو يعيـن ويستعيـن

ابـدويٍ مـا يقـوده للـردّى شـد الحـبـال
يعسـف اليـدّ الشحيحـة للعطـا حتـى تليـن

همنا فعـل الرجولـة رمزنـا لبـس العقـال
وانتي المكياج كله صار فـي وجهـك سجيـن

عندك المكياج موضـة تحسبيـن إنـه جمـال
صار همك فـي حياتـك تكشخيـن وتطلعيـن

والا أنا قلبي بقـى لـي بالمحبـة راس مـال
والله اللـي مبتلينـي بالـهـوى والله يعـيـن

إن بغيت أعشق أبالقـى كثـر حبّـات الرمـال
لكن انتي لو بغيتـي صعـب مثلـي تعشقيـن

قلت لك كل الصراحة وأختـم أطـراف الجـدال
وإن زعلتي مـن كلامـي تزعليـن وتقعديـن

05-31-2007, 07:53 PM

قالها حامد

تماديتي وأنا مثلـك تماديـت بهجـر وبعـاد
وكـلٍ مثّـل عنـاده خفـوقٍ ثابـتٍ صامـد

وإذا عندك بعادي عيد ترى عندي جفاك أعياد
وعسى طول الجفا مني يليّن قلبـك الجامـد

أبضحك وأظهر البسمة ولو إن الجروح اجداد
وترى قلب الحريقة ضو ولو وجه الحطب رامد

بكون أكبر من الغلطـة وبعلـن للهوا ميـلاد
إذا كان الخطا منـك مجـرّد ثـورة الخامـد

وإذا كان الجفا منّك مسافات وغـلا وعنـاد
تراي أكبر من عنادك وقولـي قالهـا حامـد

06-01-2007, 01:23 AM

مشكورة إختي..

فتاة العميد..

تسلم إبدك يارب..

تقبلي مروري..

ولد العز

06-01-2007, 01:35 AM	#7 (permalink)
.:. ][ حَتَى بِأحْلامِي تَمْنِيِتَكْ ][ .:.

حـــــامـــــد زيــــد

البوح الشعري